Бүгін төрт курсанттың ата-анасы ҚР ІІМ Шырақбек Қабылбаев атындағы Қостанай академиясында оқып жатқан балаларының өмір сүру және оқу жағдайларымен танысты. Олар жатақханаларды, асхананы, мұражайды, кітапхананы аралап, оқу корпустарының рекреацияларынан өтті. Курсанттардың ата-аналарымен Академия бастығы полиция генерал-майоры Ақынқали Дәрменов кездесті. Ол ата-аналар тарапынан оқу орнына көрсетілген көңіл үшін ризашылығын білдіріп, алдағы уақытта өзара іс-қимыл мен бірлескен жұмысқа үміт артатынын жеткізді. - Академияның да, балаларымыздың да хәл-жағдайы сіздің де белсенді қатысуыңызға тікелей байланысты, өз тарапымыздан сіздердің барлық ұсыныстарыңызды, ескертулеріңізді тыңдап, олар бойынша тиісті шаралар қабылдауға дайынбыз. Біздің басты мақсатымыз - жоғары оқу орнының қабырғасынан лайықты әрі білікті мамандарды шығару, - деп қорытындылады өз сөзін Академия бастығы. Курсанттардың ата-аналары өз кезегінде білім ордасының басшылығына қонақжайлылығы үшін алғыстарын білдірді.